هبهدل جنابك ......

يا شعبي الحبيب..... يا روحي يا بيبي

يا حاطك في جيبي .. يابن الحلال

يا شعبي يا شاطر.... يا جابر خواطر

يا ساكن مقابر.. وصابر وعال

يا شعبي اللي نايم.. وسارح وهايم

وفي الفقر عايم... وحاله دا حال

أحبك محشش... مفرفش مطنش

ودايخ مدروخ وآخر انسطال

أحبك مكبر.. دماغك مخدر

ممشي أمورك كدا باتكال

وأحب اللي يكدب.. وأحب اللي ينصب

وأحب اللي ينهب ويسرق تلال

وأحب اللي شايف.. وعارف وخايف

وبالع لسانه وكاتم ما قال

وأحب اللي قافل عيونه المغفل

وأحب البهايم... وأحب البغال

وأحب اللي راضي.. وأحب اللي فاضي

وأحب اللي عايز يربي العيال

وأحب اللي محبط وشايف المحال

وأحبك تسافر... وتبعد تهاجر

وتبعت فلوسك دولار أو ريال

وأحبك تهلل.. تهبل تطبل

عشان ماتش كورة ..وفيلم ومقال

وأحبك توافق تنافق

وأحبك تؤيد تعزز تمجد توافق تنافق

وتلحس نعال

لكن لو تفكر....

تقرر....

وتبدأ تشاكل.. وتسأل سؤال

هــــــــــــــــــــاااا

وعايز تطور... وعايز تنور

وتعملي روحك مفرد رجال


هــــــــــــــــــــاااا

ساعتها هجيبك.....

لا يمكن هسيبك......

وراح تبقا عبرة وتصبح مثال

هبهدل جنابك ......

وأذل اللي جابك ......

وهيكون عذابك دا فوق الاحتمال

وأهزأ سعاتك... وأبهدل سياتك

وتبقا كرامتك في حالة هزال

وتلبس قضية.... وتصبح قضية

وباقي حياتك تعيش في انعزال

هتقبل...... هحبك

هترفض.... هلبك